Gabay---( Rati Qooqan )-- Abwaan Aadan Faarax Awjaamac Shuuriye

10-03-14 Gabaygan Ayaa Waxaa Tiriyey Abwaan Aadan Faarax Awjaamac Shuuriye. Waa tix uu abwaan shuuriye ku halqabsaday abwaan Ismaaciil Cal Boobe.

Gabaygan ayaa wuxuu ahaa Gabaygii ildaha u furay gabayo dhawra oo ay isdhaafsadeen halabuuro kuwaas oo markii dambe noqday silsilad taxane ah taaso la baxday Ramliyo Raad Guur.

Gabaygan oo ah kii ugu horeeyey e silsiladaasi ka bilaabantay anigoo sii faahfaahsan sharax uga bixinayn wuxuu abwaan aadan shuuriye usheegaya abwaan boobe inuu iska dhaafo gabadha carmalka ah ee jacaylkeedu asqeeyey oo uu doonto hablaha bikrada ah. .

**Rarran weeye caashaqu hadduu, ruuxa daashado'e
**Cilmi inuu raqdiis dhigay malaha, waa run la ogaaye
**Rafaadkuu Imacil la maray, raysan waa noqoye

**Rubadiyo jidhku ka qabsadoo, rarayey maalmahane
**Raxanreeb salkeed buu la galay, ruuga guu jaraye
**Carmal buu riyaaq uga dhigoo, habar u reeryeeye

**Rati qooqan geelu arkaba, raacyey oo sheenye
**Roorsiga duqaha laga ma karo, awrkii reerya lehe
**Raxma iyo hablaha buuxe ee, reeraha u jooga

**Garoob inaad ka raacdaa malaha, kugu ma roonayne
**Ra'yigaa ismaciil ka noqo, kugu ma raacsaniye
**Raxan adhiye bahalkii didshee, duurka raacdaysta

**Ri'da shilis ayuu kala baxaa, meesha ugu roone
**Caatadu raq weeye dhurwaaguba, ma raadsado'e
**Raxma iyo hablaha buux ee, reeraha u jooga

**Garoob inaad ka raacdaa malaha, kuguma roonayne **Ra'yigaa ismaciil ka noqo, kugu ma raacsaniye
**Reer dumar leh waa laga xushaa, geenyadii roon

*Ragna baali kuma sama midii, reerka aan dhaqane
**Raaliyadu waa wacantahoo gaari waa rayse
**Ruun gabadha baa laga helaa, raasa maal wacane

**Garoob lagu ma reeyo iyadu, maba leh raandhiise
**Raxma iyo hablaha buux ee reeraha u jooga.
*Garoob inaad ka raacdaa malaha, kuguma roonayne

**Ra'yigaa ismaciil ka noqo, kugu ma raacsaniye
**Raga talada waa lagu yaqiin, reerki odayo lehe
**Rabi wuxuu ku siiyana ma jiro, ruux dafirayaaye

**Calafkuna run weeyo malaha, caashaq waw raase
*Raxma iyo hablaha buux ee reeraha u jooga
**Garoob inaad ka raacdaa malaha kuguma roonayne
*Ra'yigaa ismaciil ka noqo kuguma raacsaniye.

WQ: Maanmaal Buureed Gurxan