Abwaan Jaamac Murtisame-- "Aniga Uun Baa Og!"

Gabay "Aniga Uun Baa Og!"

Gabaygan waxaa tiriyey Abwaan Jaamac Cali Xirsi(Jaamac Murtisame), hilaadda miilaadigu markay ahay 15-04-2015. 

Abwaan Jaamac Murtisame wuxuu yiri:

❁In abeeso bahal hoose tahay, ruux ajalay baa og

❁Anuu aar libaax aadun yahay, aan usta aqoonin

❁Nin uu aawr ka laaya ogsoon, anafaduu gaysto

❁Arxan-laawe inuu yahay, wuxuu iligta saara og

❁In abaari oon iyo dhib tahay, lagu asqoobaayo

❁Ishin iyo qofkii daaqsada, nugul idaa baa og

❁In aroosku udug iyo nur yahay, la isreexaayo

❁Iskaabulo wakhtigu ulayo, iyo hebelo uunbaa og 

❁Inay diintu iimaan tihiyo, nalal iftiimaya

❁Qof Islaama uun baa ogsoon, udub dhexaad keeda

❁In colaadu alam iyo dhib tahay, oofna kugu reebto

❁Dad amuuri kala haysatiyo, ehel is-laaya og 

❁In anshuxu wanaag yahay, qofkii edeble uun baa og 

❁Inay quruxdu astu-raanta tahay, gabdh ayaanlaa og

❁Ayaan qudha inay dunidu tahay, laga arooraayo

❁Qof illahay garan baa ogsoon iil, in lays dhigi!

❁In laaxadku aaladdo yahay, lagu adeegayo

❁Adoon aan lahayn baa ogsoon, oo indha beelay!

❁Inuu caafimad uusi yahay, malab irmaan dhiiqa

❁Qof ay aafo kala gosey iyo, marad inkaara og!

❁Inuu waalid adhaxdaada yahay, unuga beerkaga

❁Qof agoon ku koray baa ogsoon, aabe iyo hooyo!

❁Adigana abaalkiyo xaqaaga, aniga uun baa og

Tixraaca

1- Maanmaal Buureed Gurxan(2015). Gabay "Aniga Uun Baa Og!". Hal-abuurkii Soomaaliyeed Weli Ma Dhiman. Kampala. Uganda.

Abwaan Muxamed Haykal Muxumed Cabdi--- Maanso "Ab-waanshe Iyo Wabiin Wadaad-diide"

Maansadan la magac baxday "Doodii Ab-Waanshe Iyo Wadaad-Diide", waxaa tiriyey Abwaan Muxamed Haykal Muxumed Cabdi tirsiga hilaadda miilaadigu markay ahayd 15-04-2015. Waa maanso aad ka dheegan doonta sida idiinka muuqata Ab-waanshe Muxamed Haykal habka quman ee murtiyeysan inoogu soo gudbinayo dooddii isaga iyo Wabiin Wadaad-Diide dhexmartay.  Ka bogosho wacan wuxuu Ab-waanshe yiri:

--Anigiyo nin waayadan

--Yara wabax taraaroo

--Lagu diray wadaaddada

--Ayaa dood wanaagnoo

--Weyddiimo dooriyo

--Ka jawaabid waafiya

--Isu wabinnay dhawr jeer;

                

--Wuxuu yidhi wadaaddadu:

--Ninyoow waayadii hore 

--Waxa ay ahaayeen

--Niman weyso qaatoo 

--Wardiyoo shallaadoo

--Markay reer ku weecdaan

--Wanan loo bireeyoo

--Wacdigiyo xadiiskiyo

--Waslad hilib ah mooyee

--Walax kale ku hawshoon!

--Waxaan idhi wadaaddada:

--Wacanoow Rasuulkii 

--Warasada Anbiyadiyo

--Wanaag buu ku sheegoo

--Waqood abadankoodii

--Rabbi weedhihiisiyo

--Waxyigiyo kitaabkiyo 

--Xaqa waadixiisiyo 

--Wacad Eebbe mooyee

--Ma wax lagu dhaliiliyo

--War xun baad ka haysaa?

-------------****---­--------

--Wuxuu yidhi wadaaddadu:

--Waagii colaadaha

--Haddii weerar uu dhaco

--Amma Wiido lala tago

--Dabadeed wisiisiga

--Warmo laysku dawdabo

--Waxba kuma filnaan jirin!

-------------****---­--------

--Waxaan idhi wadaaddadu:

--Caamada warkeediyo

--Weheshiga qabiilkiyo

--Walacsiga sharkiisaba

--Weynaa ka dhawroo

--Ma'hurtada is wiiqdee

--Waaxyaha is goysiyo

--Dakanada walaalaha

--Taariikh la weriyiyo

--Wax san uma rumaysnee

--Waddo kale ma haysaa?

--Wuxuu yidhi wadaaddada:

--Wakhtigeennan joogaa

--Shiddo iyo waxyeelliyo

--Muran iyo wareer iyo

--Wahan bay na geliyeen!

--Waxaan idhi wadaaddadu:

--Ma ogtahay walaaloow

--Markay kala warraaqdee

--Taladuna wansiixdee

--Waddankeennu baabba'ay

--In ay kaalin waafi ah

--Wadartood guteenoo

--Hadday tahay waxbarashiyo

--Waqafkiyo agoontiyo

--Waaxyaha dhaqaalaha

--Waxtar togan ka gaysteen?

--Wuxuu yidhi wadaaddada:

--Wakhtigeennan joogaa 

--Gabadhii wacnaatee

--Weji iyo hannaanlee

--Waqal iyo daruur u eg

--Intay waalidkeediyo

--Waaligeeda doontaan

--Woxogaa adduunana

--Warqad uugu laabaan

--Ayaa lagu wareejaa

--Hawl yaraan walwaashaan!

--Waxaan idhi wadaaddadu:

--Sidii weylo oon dilay

--Weyd socota maahoo

--Caleen lagu wareeriyo

--Qaadka kuma walfaanoo

--Waayirradu ma gubannine

--Hadba waajibkooday

--Werwer li'i gutaanoo

--Noloshaba intii wacan

--Ayay weheshadaanoo

--Waxaan Eebbahood farin

--Wakhti kagama baaqdee;

--Maxaad adigu wiiloow

--Waagii guduutaba 

--Wax xun uga qortaayood

--U dhigtaa Websaydyada? 

--Wuxuu yidhi wadaaddada:

--Adaa Weliyo moodee

--Diinta kama wakiil aha

--Aniguna warkoodiyo

--Wadar ceebahoodaba

--Wax kastoon ka qori karo

--Waan sii wad'wadayaa!

--Waxaan idhi wabiinyahow:

--Wanaag uuma jeeddide

--Sidii ruux wajaqanoo

--Beri waashay oo kale

--Walwalaaqo caydoo

--Ku waliimo murankoo

--Weligaa is yeelyeel

--Aniguna wed mooyee

--Inta weedha gabaygiyo

--Weeraarta maansadu

--Weelka iiga buuxaan

--Wallee kaama waabtee

--Waa innoo fagaaraha!

Tixraaca

1- Maanmaal Buureed Gurxan(2015). Maanso "Ab-waanshe Iyo Wabiin Wadaad-diidde". Hal-abuurkii Soomaaliyeed Weli Ma Dhiman.

Maanmaal Buureed Gurxan-- "Cilmaaniyiintu Waa Cawaan Sugane"

Cilmaaniyiintu Waa Cawaan

Sugane

Gabaygan waxaa tiriyey Maanmaal Buureed Gurxan tirsiga hillaadu markay ahayd 8-October-2014. Ka bogosho wacan.

Maanmaal Buureed Gurxan wuxuu yiri:

★Caynka gabay anigoo yar baan, caarif ku ahaaye

★Curinteeda waataan aqiin, camalka suugaane

★Camuudaa ka badan maansadaan, ceelka soo tubaye

★Ciyaarna uma aan tirshee, waw cug tiriyaaye

★Ciddad baan u dhawraa wakhtuu, coonka soo galiye

★Aan cadeeyo caawana mid bey, cugatay laabtaye

★Maandhow cilmaaniyiintu waa, cawaan sugane

★Waa duul caqiibiyo ka tegey,  caamka diiniga-e

★Waa duul caqligu rogan yahoo, caabudaad gabaye

★Waa duul aayadaha cadiimkeen fasilay, caad ka qariyaaye

★Waa duul caasiyoo kibroo, cunay jidhkoodiiye

★Waa duul qalin ku ceesho dafiray, caalimka illaahe

★Nin cilmaani caawiyaan marnaba, cidhib lahaanayne

★Waa duul camalkodu yahay, diin canjarafeeye

★Waa duul calaaniyo majnuun, caaq u taliyaaye

★Waa duul cascas lacaga dhaafsaday, qowl casiis yiriye

★Waa duul caalcalaha dhigtoo, gaalku ceeshimiye

★Waa duul cantuugoo bakhtiga, cunaya doonfaare

★Waa duul caqligu u bukoo, maanku caabuqaye

★Waa duul cindigu madhanyohoo, jooga ceel qudhune

★Waa duul sunadii ka caagoo, cawda loo jariye

★Waa duul xumaatada ku caan baxay, ceebna qaayibaye

★Waa duul tubaakada cantabo, calaashadoo ruugiye

★Waa duul kun caagoo khamriya, cabaya leylkiiye

★Waa duul ciqaabiyo nacliga, u casuun galiye

★Waa duul ku caanoo kibriga, cuuf la gurayaaye

★Waa duul sidii caalle ey, carabyo dhaadheere

★Waa duul caaraystoo jahligu, cudur ku beeraaye

★Waa duul cilaaq iyo buuq, waqood cadhadhaqleeyaaye

★Waa duul cisho ninkii wacdiya, caasha galiye

★Waa duul culimiyo waayeel, caayi caaqilkii wacane

★Waa duul cid dhaafaynino, xumaha caadood tahaye

★Waa duul cadaabta u ordoo, cagagsan naartiiye

★Casiisow allahayow adaa, Caadiloo wacane

★Casaawajalah Eebow adaan, caawintaa rabiye

★Cadiimow naga najee waan, cabsanaynaaye

Tixraaca

1- Maanmaal Buureed Gurxan. (2014). Gabay "Waa Cawaan Sugan". Hal-abuurkii Soomaaliyeed Weli Ma Dhiman. 

Kampala. Uganda

Abwaan Jaamac Cali Xirsi-- "Ma Og Tahay?"

Gabaygan waxaa tiriyey Abwaan Jaamac Cali Xirsi(Jaamac Murtisame). Ka bogosho wacan.

Abwaan Murtisame wuxuu yiri:

☞Ma og-tahay hayaan baynu nahay, loo humhamay geediye?
☞Ma og-tahay horaan qaadki tegey, haabba laga waaye?

***

☞Ma og-tahay habaas meele baa, hiilin keen yahaye?
☞Ma og-tahay hanfiyo waa kulayl, halac abaareede?
☞Ma og-tahay halkaan beeganaa, hadhacla weeyaane?

***

☞Ma og-tahay haraad baa ka jira, lagu hanqaar maaye?
☞Ma og-tahay hilbiyo lagama, helo caanihii halabe?
☞Ma og-tahay inaan haybi jirin, aad u hoyataa?

***

☞Ma og-tahay habeen iyo dharaar, waan is-daba hayn?
☞Ma og-tahay waxaan sii hilayn, taniyo haabiil?
☞Ma og-tahay hal ruux oo kastaba, waa hogaan qabade?

***

☞Ma og-tahay hal door kaa tahaad, heeli geed guran?
☞Ma og-tahay hirdoog iyo abaar, oo is gudub hasta?
☞Hadba kaad adigu hiishataad, heeryadii dhigan!!!

***

☞Ma og-tahay abees halable iyo, halaq waxaa jooga?
☞Ma og-tahay cidkuu hiilisiyo, hooyo iyo aabo?
☞Ma og-tahay inaan hanado jirin, haybta kugu raacda?

***

☞Ma og-tahay hanyari waa inaad,  dib u hagaastaa?
☞Ma og-tahay hadaad habacsan tahay, waad hawiraantaaye?
☞Ma ogtahay jidkoo halaqle baad, ku hiran doontaaye?

***

☞Ma ogtahay hadhkii galabnimaan, haatan maranaaye?
☞Ma ogtahay hantiyi waa waxaad, maalinta heline?
☞Ma og-tahay salada horkicin, oo hub kuu noqone?

***

☞Soonka halaac kaga wacan, aad ku hirataaye
☞Ma og-tahy sakadu waa hu'iyo, shaal hadaafyale?
☞Ma og-tahay sadqadu hiil tolnimo, kaga wacan haatan?

***

☞Ma ogtahay hajjuna waa biyaha, hiifta kaa tira
☞Allahayoow hanuunkii jannada, hoy nimcadu taalo

Aamiin

Tixraaca

1- Maanmaal Buureed Gurxan (April-2015). Gabay "Ma Og Tahay". Hal-abuurkii Soomaaliyeed Weli Ma Dhiman. Kampala. Uganda.

Copright: Naadiga Qalinmaal 

Tixo Gole-Ka-Fuula Oo Ay Is Dhaafsadeen Abwaan Ismaaciil Boobe Iyo Abwaan Buuni Fiqi Faatax

Waa labo tixood oo gole-ka-fuula oo ay is dhaafsadeen labada hal-abuur ee gaasobaxay ee la kala yiraahdo Abwaan Ismaaciil Cali Boobe Iyo Abwaan Buuni Cabdirisaaq Siciid(Fiqi Faatax). Waxay tixahakani Ildi-furteen 15-Sep-2014. Ka bogasho wacan 

Abwaan Ismaaciil Cali Boobe wuxuu yiri:

❄Indhoweyd ya'dii gabay ka tegey, yiha-shadeediiye

❄Ma yohoomin tixahaan, yaafadayn jiraye

❄Yeelahaan u xidhay Cabdoow, yoolka maansada e

❄Ka yabaalay goortay midhaha, yaahiyeen badiye

❄Yaacadaan ka joogsay markaan, yaab u soo baxaye

❄Marse haddii yaxyaxiyo xishoodiyo, wanaag yurantidii diiday

❄Oo yabadh iyo dilaaliyo, yuuqis lagu raadshey

❄Yeeli maayo anigu kufsiga, lagu la yaacaaye

❄Yeelaha haddii aan saaka jaro, hay la yaabina e

❄Yal qabow dabayl iyo, yalaxlihii dayrta

❄Yalawdii hilaaciyo gu'goo, curasho yoomaaya 

❄Yeelaha haddii aan saaka jaro, hay la yaabina e

❄Haddii aad yagleeshoo murtida yeedhin garanayso

❄Yafanuunka waa laga jiraa yaac sheyoo iriye

❄Yac yacoodka waa laga rawaa wayku yabaqdaaye

❄Iskana yoohi maahee tixaha waa gabayga yool siiye!!

☞Abwaan Cabdirisaaq Siciid(Fiqi Faatax) ayaa Tixdaas Abwaan Boobe uga halceliyey, tixdan Fiqi Faatax waxay ahayd mid iyana gol-ka-fuul ah wuxuuna yiri:

❁Ya'du way ka adag tahay xarfahaha gabay ku yeelmaaye

❁Inkastooy yar tahay oo abwaan qurihi yookeeyo

❁Anigu waan ku yuruurin halkay, yadada saaraane

❁Yamyaym iyo sidii Boobe baan, yoolka helayaaye

❁Maantana yalkaa xamar ka jira, yaabka laga sheegin

❁Yaahida hablaha boobaysiyo, yeyda guranaysa

❁Yaahuuda amison waxaa, yoomi baladkeena

❁Yabaal bayga galay dawladaan, aan yac oronayne

❁Waa yacayga bahal noo galoo, aan yurda aqoone

❁Xasan oo yabooh doonayaa, yaaq la hoos galaye

❁Yasmiina sharafteedi buu, yaabis dhaafsadaye

❁Yaxyaxi maayo ruuxaasiyoo, waa yalaalugo'e

❁Iga daaya yawdiina badan, qaran yatiimawye!!

Tixraaca

☞Maanmaal Buureed Gurxan(16-Sep-2014). Hal-abuurkii Soomaaliyeed Weli Ma Dhiman.

Abwaan Jaamac Murtisame-- "Qudhac Jabay"

"Qudhac-Jabay", Gabaygan hilaaddu markay ahayd 24-Nov-2013 waxaa tiriyey Abwaan Jaamac Cali Xirsi loona yaqaano Jaamac Murtisame. Ka Bogasho wacan. Abwaan Murtisame wuxuu yiri:

❁Qabtii yeedhay qoontii dhacdiyo, dogobadii qiiqaay

❁Qudhac jabay sidiisii markii, qarankii loo tuuray

❁Qamar dhacay qiyaas xumo markii, qoriga loo qaatay

❁Qoys qoys markii ay tagtiyo, anaa qabka wayn le

❁Quruxdii miyaa laga tegoo, qamax la weecaanshey?

❁Dhulkoo qaniya qayraadka yaal, gaaja lala qooxmay

❁Qabqabliyo miyuu qoofilkii, nagu qaloobeyey?

❁Qolqolkaad istaagtaba miyuu, maydku qolofoobay?

❁Qaaradaha aduunyada miyaa, layga wada qayshay?

❁Qubnaan tayda nimankii jeclaa, cadawgu may qaybshay

❁Qooqaan waxaan haysan jirey, dacar miyaan quutay?

❁Qadawgiyo Miyaan shiday halkii, qabadu ii tiiley

❁Qarihii intaan ololku shiday, miyaan qalfoof diirtay?

❁Qooqaanidii miyaan shidoo, quule dubatoobay?

❁Qabogiyo dhaxantii miyaa, qayda igu reebay?

❁Ma qadiifadii iga xigtaan, subax ku qayraanshey?

❁Qolkii aan ku jiray iyo miyaan, qaraf dhulkii saaray?

❁Qaas iyo miyaan qiiq ku shiday, oo dab qabad-siiyey?

❁Qaxarkiyo dhibatada miyaa qayrkay iga reebtay?

❁Qiimiyo waxaan magac laha, subax miyaan qaaday?

❁Ma qaraasinaa iibaxdoo, lays la wada qeexay?

❁Qasnadihii dalkaygii miyaa gaalku wada qaatay?

❁Qaybtaan lahaa dunida ee, qaadir igu beeray

❁Qorsha xumo intaan qarax la dhacay qorofad maan qaatay?

❁Qaxar kiyo dhimaatada miyaan, qaybta sare yeeshay?

❁Ma qaxoontibaan qabawga yurub, qayna laysiinin

❁Qushigaa miyaa laydhahaa waa, qorkaan helaye

❁Ma qabyaalad iyo waxa i hoday, waxaan ku qayr beelay?

❁Qaar qaar miyaan isu jaroo, qalay jidhkay goodhan?

❁Qoon qoon adduunyada Rabbaa qaaradaha joojey

❁Qoloqolona waa leeyihiin, qoysas kaa badane

❁Maxaa qoorta noo sudhay inago inagu qaas yeelay ?

❁Soomaalaay qaraabaynu nahay, qoys walaalahe

❁Qoon wada Islaamaynu nahay, qiila wada haysta

❁Qarni iyo nus weeyaan intaan, dhiiga qubaynaaye

❁Oo waa is wada qoonsanaye, qira xumaanteena

❁Ceebna kama qaloonee horaan, ugu qamaamnaaye

❁Miyaynaan qismiga diinta iyo qaadir ka aqoonin?

❁Quraankiyo axdiistiyo miyaan, qeexid nala siinin?

❁Qafaaroow Illaahaaw adigu qayrka nagu leexi

❁Qaadiroow quluubahayaga, geli qushuucdaada

❁Qafaaroow qabiilkana ka saar, waa wax qaab darane

❁Qaaxiyo xanuun weeye iyo, aado iyo waali

❁Qiila malaha aakhiro illaa, qolalka naareede

❁Qaadiroow qalbiga noo safee qaali baatahaye

❁Qafaaroow qastawnaye adigu qaab uwada jeedi

❁Qaran iyo Illaahow na sii nabada, qayb fiican

❁Qawanaan ma dhaanee Allow saan ha nagu qaadin

❁Qabawsimada roobkiyo Allow, quruxda jeegaanta

❁Qooriga qalalkiyo Allow, wada qoyaa gu

❁Qayraadka Eeboow sii adigu qaali baa tahaye

Tixraaca:

Maanmaal Buureed Gurxan(24/Nov/2013). Hal-abuurkii Soomaaliyeed Weli Ma Dhiman. Kampala. Uganda