Gabay:Gudban Ama Gaalo-leged

SAYID MAXAMED CABDULE XASAN 

-----------------------------------------------------------------------1898dii ilaa 1910 ayaa Sayidku dadka wuxuu ku waday waano iyo waxsiin si loo helo israac iyo wadajir, gaalana meel looga soo wada jeesto. Inkastoo xaruntii dad badani raacay xoogna ay yeelatay haddana dadkii daraash ku maageerraa aflagaado iyo adyad bey ka deyn waayeen iyo iney gaalada garab iyo gaashaanba u noqdaan. Markaa Daraawiish waxay la ahaatay haddii waanadii iyo wanaagii la diiday in waran caaradii lagu dayo. sagoo Sayidku Daraawiish gubaabinaya, wixii loo geystena faalo ka bixinaya dabadiisii la laayeyna gocanaya, waxay ka fali doonnaan tusaalaynaya, meelaha in nabarro loo gesto ku haboonaanna timaamaya wuxuu tiriyay gabaygan soo socda magiciisana la yiraahdo "Gudban" Daraawiishise wexey u tiqiinay "Gaalo lagad" ( 1 ) Gudban waxaa loogu bixiyay Saydkoo isu mariyay bari iyo galbeed. (2) Gaala-lagad waxaa loogu bixiyay niman aqooni Daraawiish ahyn, wuxuuna gabaygani ka mid yahay gabayada geyiga oo dhan ku faafay

• Awel maanso waataan gudbo, gudhiyey waayaaye
• Waataan galbeedkaas u diray, guga hortiisiiye
• Aan gaasheeyo tii xalay hurdada, gama'a ii diidday
• Galladaha Illahay ka badan, geedahaas baxaye
• Guushuu inoo yeelay baan, idin garwaaqsiine
• Guddiyeey i maqal waxaa tihiin, gacaladaydiiye

• Najiskii gurta xumaa hadduu, shalayto geeryooday
• Godka lagu cadaabkii haddaan, gawrac ugu jiiday
• Uu guduri cunay waa waxay, galabsanaayeene
• Dhurwaagii ka giigaan u diri, gacan salaameede
• Isagay gargaaroo dugaag, iiga goonniyahe
• Haddaan garan gunaan siin lahaa, gooriyo ayaane
• Gandaldheere waataan wax badan, guuyaduu maraye
• Gef hadduu ku sii daray wixii, iiga goonniyahe

• Anigu wow garaad qabay inuu, gigi waraabuuye
• Giriirixis aan jirin waa wixii, gaabshay oo rogaye
• Gaaleyska waataan la dhacay, gucurradoodiiye
• haddeeyaan abaal gadin sidaa, uma gadoodneene
• Godolkiyo kasnaantaan u qabay, kama galgaaleene
• Kumana gaagexeen abid hadday, nabad ku goohaane
• Waxse mowd ku gaardiyey markay, ganafka taageene
• Gobeygii Shuxle ahaa haddaan, gowsihii jebiyey
• Gegida Yuusuf Jiifaa tukuu, gabas-dhebaayaaye
• Geesaaska dumarkaa sidii, galow la moodaaye

• Geed-joogahoodii haddaan, gudurigii siiyey
• Guska Taajir baa ii hadhaan, ugu gamuumaaye
• Cismaan iyo waxaan gaadayaa, gabannadiisiiye
• Majeerteenka kale inaan ku gudo, wayga garanuuge
• Garacyada Bahdira haatanaa, guuto loo wiciye
• Waa lagu galaal xoorayaa, gurigi reer Nuure
• gabagaba-rogaalkaa warmaha, lagu ganaayaaye
• goobbay ku wada le'an sidii, goosan weer helaye
• Gafuurraxun sidee Eebbahay, guuldarra u raacshay
• Afartaa geddii aan bartiyo, gololo'daydii dheh

• Gerbidaan ka soo hoorin jiray, godol naqaygii dheh
• Madfac gow yidhaahdiyo rasaas, gininigtoodii dheh
• Guulaamo roob da'ahayiyo, gababaxdiisii dheh
• Onkod guguguclayn iyo hillaac, galalacdoodii dheh
• Gufaaciyo gudgude soo curtiyo, garamahoodii dheh
• Guluuliciyo mayay laysku daray, galangalkoodkii dheh
• Gal xareeda daad soo gabraday, gal iyo duufaan dheh
• Bad gariirtay mowjada gurxamay, gacammadii Ayl dheh
• Shir la gooday waayeel gab yidhi, garangartiisii dheh
• Xidhiidh lagu gimmaamadahayiyo, gola firaasheed dheh

• Xaajada ninkii garanayiyo, gig iyo sheeggeed dheh
• Gobo'kalana waa aniga iyo, ged iska sheeggayga
• Galiilyoodayeey cadho miyey, gubatay laabtaydu
• Gogoshii la ii dhigay miyaan, geydh la qaban waayey
• Gabbal dhiciyo waaberi miyaan, socod ku gaaraaday
• Gadiid maalin oo idil miyaan, gaafka sare meeray
• Sidii awr gabraareed miyaan, gululubluu rooray
• Ma gudoodigiyo suudigaa, gubadka ii yeelay
• Ma geddaabadhabadkaa sidii, geri boodheeyey,

• Gooxii aan yuururay miyaan, gibil madoobaadey
• Raggii igu gadaannaa miyaa, aakhira u guuray
• Goortaan garwaaqsaday miyaan, gocoshadii eeday
• Gamiinkaan xanuunsaday miyaan, gorodda laadlaadshay
• Gelin haddii aan foororay miyaan, giirka kor u qaaday
• Guhaad iyo calool xumo miyaan, geyrtayoo diriray
• Hadba gees miyaan deyay intaan, gownaxyada buuray
• Guntigaan maroorsaday miyaan, labada low geeyay
• Gaashaanka iyo tiirigiyo, gamas miyaan qaatay

• Ma genbaan u taagnahay intay, gaadho noloshaydu
• War ma Dhooddi baa gaamuroo, garabku weynaaday
• Ma galaasa miidaan ku shubay, gamashigii Dayrta
• Gorgor kacey la moodyow durduro, ma igu gooraamay
• Godobtaydu waa wada jirtaa, goonyohoo idile
• Gashi niman ku leeyahayba waa, dabagelaayaaye
• Waxaan goosan karo anigu waa, gurubsanaayaaye
• Gardarradiyo maaggii i helay, waan ka geylamiye
• Gartay weeye dunidaba inaan, galalafeeyaaye

• Giyigaba waxaan doonayaa, inaan gumeeyaaye
• Nin ganaananayaan ahaan, gabarna dhaafayne
• Waxaan geysto oo idili way, gun iyo rayrayne
• Giyigaba waxaan doonayaa, inaan gumeeyaaye
• Anigaba geddey igu faleen, waa gaggaab culuse
• Gallad nimaan ka qabo laguma oga, gebiga Daaroode
• Giddigoodba waatay girliga, nagu garaaceene
• Anaa gaafahaaygii nadhaye, geyste nabarkiiye

• Anna waxaan rasaasta u gingimay, gini colaadeede
• Gabagabaha Bari waxaa ku xigi, go'aha Iidoore
• Guban iyo Burciyo Looyo waa, gaalib weerar e
• Gooddiga Arooraa fardaa, lagu garmaamayne
• Gaaroodi iyo waa la tegi, buurihii Golise
• Galaayuubta Hagar-Aadan baan, gaaddow marine
• Gembi wowgu ridi fulayadii, ganafka dheeraaye
• Geeltoosiyaha waa la siin, guucurradoodiiye
• Sidii garowhadhuudh baan kurtiis, guran Ogaadeene
• Galaamaha haddii aanan ka deyn, goor walbaba jooga
• Inshaa Allaahu waa gurahayaan sida gal miireede
• Gurraasiyo Iljeex waa la qaban, gooshka haatana e

• Malahayga waa lagu galgalan, gaanka reer Dalale
• Gaas baa ku caran reer-Subeyr, goborra wyntiiye
• Kolaan Goora-cobolley ka dayo, amase Geel-loo-kor
• Huwan waa ka gabangaabsan jirey, gelin ma waayaaye
• Haaruun xaggee baa la geydayen, Goha miyuu dhaafi?
• Afartaa gudbaye balaan mid kale, soo gadaal celiyo
• Sidii goray garraar sare ka baxay, garabka maan taago
• Waxa guudka iga fuushan iyo, galayax maan muujo
• Gabgabtiyo galaydhyeyntu waa, godol hortiisiiye

• Ninkii goomman wow shubahayaa, galaxa caanoode
• Gabbaan laguma sooree nin raga, balaan ganuun siiyo
• Waa gaaxsanaan jiray tan iyo, garashadaydiiye
• Sidii goodir dhalay haatanaan, gaawa leeyahaye
• Aan gafleeyo geerarshahaas, gaafan baan ahaye
• Xaajada nin gunaan ahee, aan u garraaddeeyo
• Markab aashi gaambiyi sidiis, balaan u guurreeyo
• Meeshuu garraarkeedu jiro, gow aan kaga siiyo
• Nimaan gedo yarayn baan ahoo, Gaaddaweyn jiraye
• Waa ii garaad li'i dantay, inaan ka gaaftaaye

• Gobo kalana waa Eebbahay, midaan galliimeystay
• Eebow geyiga oo dhan waa , nala ka guulaaye
• Waa noo gedleeyaan dadkii, gaalada ahaaye
• Eebbow Giriig kolay ku tahay, nala gamuunneeye
• Go'na lagama qaadine dulmay, nagu gelaayaane
• Gabbaad kale hadday noo helaan, waa gam'i lahaaye

• Eebow waxay nagu garbeen, diinta soo gala e
• Eebow gadhka haddaan qabsaday, gaaxshe nabaddiiye
• Eebow gammaan iyo waxaan, gini cas dhiibaayey
• Eebow garow kagama helin, goolashaan wadaye
• Gambalaaligii bay warmaha, nagu garraaxeene
• Eebow waa gumaadeen raggii, gaanaha ahaaye
• Eebow waxay gabawareen, Gaagguf iyo Xayde
• Xirsigii garaaraha lahaa, gaarufkii dile e
• Geydhaale Aw-Aadan bay, galowda taabteene
• Eebow geesigii Ina-Dherey, ugu guduudsheene
• Guxushaaga Baynaxa ilmadu, waatan gabaxleyne
• Gorroska Muuse-Taaganaa wadnuu, ila gariiraaye

• Eebow ways gamaamaa markuu, gaarka soo maro e
• Guuleedku wuxuu noo ahaa, guurti loo hiranne
• Nimankii garaaddada ahaa, waa gadow jabane
• Eebow sidii gaanti maro, waa la gaasiraye
• Eebow gaari bay reer Warfaa, guradiii saareene
• Gubni baa ku dhacay reerihii, gaannanaan jiraye
• Eebow goonni baa laga heliyo, guri qalaadeede
• Gaaggii ka hadhay reer shawaa, caydh la golosleyne
• Waxa goday sidii qaanso waa, gaajo iyo ciile
• Eebow waxaa gorof ku raray, duul Geshiiishaaye
• Caligeri sidii loo gondolay, gobolba meel aadye

• Waa gelengal nimankii fadhiyay, guriga Ciideede
• Eebow gurbood baa hadhiyo, gaban agoomeede
• Eebow goonji weyn iyo qax bay, naga gullaafteene
• Guullow ma helayaan waxay, nagu gubaayaane
• Eebow waxay naga gogtaan, waa galoof olole
• Eebow sidii guun haween, giidu waa aniye
• Eebow nin goba baan ahoo, guni rifaysaaye
• Eebow waxaa noo gurmaday, gaaya alifleeye
• Ma garaysni Eebow waxaa, guufanneyska ahe

• Eebow gabooddii dorraad, waan ka gara'layne
• Eebow markaan geyllamey, guulmiyo biqiye
• Eebow guddoonkii sharciga, gooye bahashiiye
• Eebow kufriga gedeftaley, gacanta haystaane
• Eebow anaa kugu garlee, guusha ha seejin.

Gabay: Waxaad Tiraa Weeye

SAYID MAXAMED CABDULE XASAN 

Koox Daraawiish ah baa waxaa loo diray ilaalo. Habeenkii danbe ayay degmo ku taal Saraarjiidan ku soo hoydeen.Ammin dadku haasaawayo ayaa nin wadaad ah oo la odhan jiray Aw-cabdi Walabban wuxuu yidhi "Weger war armaad Daraawiish tihiin!"

Nimankii markay xaruntii dib ugu noqdeen oo la waraystay bay sheegeen hadalkaas Dabadeedna, Sayidku wuxuu mariyey gabaygan wuxuuna ugu hal daray Ina-Walabban waxuu yidhi:-

• Xuseenow war baan kuu hayaa,waxaa tiraa weeye
• Walaalow wacdiga layna faray,ila wanaag weeye
• Waanadii astaadkeennu yiri,weer aan rabo weeye.
• Walbahaarka aakhiro inaan,wax u tabcaa weeye
• Wax sanoo aan dooniyo inaan,wax xun nacaa weeye
• Wahabnimo ma fiicnee inaan,warac noqdaa weeye .

• Diintaan wadeecada ka dhigay,inaan wallayn weeye
• Wahsi baa naftii iga jaree,inaan warfaa weeye
• Wiilnimo wixii igaga tegey,waha sideed weeye .
• Werdigiyo shahaadada inaan,weheshadaa weeye
• Weysada salaadeed inaan,waaxidsado weeye

• Waannahaarka soon inaanan soor,waana cunin weeye.
• Waxaddayda maal inaanan dago,waxar ku dayn weeye
• Wixii waajiboo idil inaan,wada gutaa weeye
• Waqfigii saxaabaha inaan,waafaqsado weeye.
• Waayeelka xaajada inaan,ugu wacaa weeye
• Haddii ay walaacan inaan, wari iraa weeye
• Xaqa lagama waabtee inaan,waa kan oran weeye .
• Wacad Eebbe iyo dhaaraan maray,inaan wafeyn weeye
• Walle beena abidkey inaanan,walafadeyn weeye

• Haddii aanan waallayn inaan,waabsanahay weeye .
• Walleys iyo nin weyn inaan xurmada,wada simaa weeye
• Nin isoo waciidsaday inaan,wax u galaa weeye
• Wayi iyo waxsiin inaan islaan, ugu wadaa weeye.
• Wadaadkii kitaabbale inaan,wan u qalaa weeye
• Walaanqihiyo dheyada inuu,walafsadaa weeye
• Weylaalis meel wacan inaan,ugu wadhaa weeye .
• Ina-Walabban oo kale inaan, weger dhahaa weeye

• Wax i sii haddu yadhi inaan, walacsadaa weeye
• Walasaqo wixii igula jira,inaan wireyn weeye.
• Ina-shixirigii wagarsanaa, weled nijaas weeye
• Warraabkii karreysaha xumaa,waraq la gooyo weeye
• Warqadduu magaalada u diray,talo wahaab weeye.
• Iidoorku weligiis inuu, wadal ahaa weeye
• Walandaadi kheyr daran inay,wax u yihiin weeye
• Waxba inuusan garaneyninoo,waalan yahay weeye .
• Wardigiyo shareecada inay,wada neceen weeye

• Nin jahaad u weyraxay inay,wahan geshaan weeye
• Sidii fule wadnii go'ay inay,waranwarayn weeye.
• Weliyada shahiidkaa kuwii, waafka jaray weeye.
• Waleecaad ha raacee Ibleys,warasadiis weeye
• Waqood abadankood inay kufriga,daba washlayn weeye
• Usaguna walaabuu helaye inuu,wasaa weeye
• Weligood jannada inaan yibruhu,waana urin weeye
• Waddada naarta loo maro inay,walashtamaan weeye.
• Raggii dunida waaqeelin jiray, igu waliil weeye
• Sidii wabarradii loo ajaley, oh iyo way weeye
• Inuu caro wiriirkeed qalbigu,ii welweli weeye.

• Wed hadduusan ii iman inaan, wax u liilleyn weeye
• Wasiirtii xigaalkey inaan,wadar u layn weeye
• Weysaaq colaadeed inaan,webi tagaa weeye.
• Ninkii gaal u wisiisiyin Ilaah,welef u keen weeye
• Wecelkaas cadaabeed inuu,weera yahay weeye
• Anna inaanan weligay canjeel, wadeecadayn weeye.
• Ninkii gaal u waasiya inaan, wabaddaraa weeye
• Warammadiyo hootada inaan,kaga websiin weeye
• Sidii weer wadaal helay inaan, wiif ka dhigo weeye.
• Waraabaha dugaagihi inuu,wabaxsadaa weeye
• Goortuu wirriijiyo inuu,waada guro weeye

• Wayaaggii ka soo hadhay inuu,haad waywayo weeye.
• Wannaskii galbeed jiray inaan,weer u xiran weeye,
• Wejigoodu gubagaas inaan,col u waddayn weeye
• Sangootida wacdowgaa inaan, wegaradeyn weeye.
• Wareegada inaan qalahayoo,weerar ahay weeye
• Winnifiirle reer Hagar inaan, wagac ku siin weeye
• Hadday soo wiriiryaan inaan,wirif ka siin weeye.
• Baqahay wajiiraan inaan, walamsadaa weeye

• Walkadaadka aan bado inay,walashtamaan weeye
• Warriiskooda cayreed inuu,Webi tagaa weeye.
• Aniguna watiinkiyo xamdiga, inaan naqaa weeye,
• Aniguna watiinkiyo xamdiga, inaan naqaa weeye
• Aniguna watiinkiyo xamdiga, inaan naqaa weeye.

    

Gabay: Ragow Kibirka Waa Lagu Kufaa

Ismaaciil Mirre
..................................................................................................................................

Gabaygan waxuu tiriyey Ismaciil mire mar Nin la odhan jirey carab dheere oo saajin Askartii gumaysiga ingiriiska u shaqayn jirey ahaa , ayaa maalin maalmaha ka mid ah Nin weydiistey Walaashii, markaas buu yidhi maxaad ku falaysaa? markaas baa ninkii yidhi waan guursanayaa, halkii jawaab ka sugayey ninkii,Haa iyo maya ayuu yidhi hala toogto, markas baa la yidhi carab ninka maxaad u dishay markaa
markaas buu yidhi anigoo carab dheere ah oo sabaankan jooga ninka walaashay i weysdiistey barina wax kale ayuu soo wataa (Hadalka waan qarinaynaa) Arinkii waxaa maqlay Ismaaciil mire oo halkaas joogay ayaa waxuu tiriyey gabaygan qiimaha weyn leh oo ragii somalida kibrey wakhtigaas ku soo wada daray marka laga reebo Mataan ciideed, ilaa hadana lama oga sababta uu uga reebay mataan ciideed ma oodhhan karno ismaaciil, mataan ciideed maqal waxuuna yidhi:

• Kulligood adoomaha rabboow, qaybsha kibistiiye 
• Qof kastoo kabtiya ama kalaha ama kur dheer fuula 
• Bad kalluun ku jirra kollay ku tahay amase koob shaah ah 
• Ninba kadabkii loo qoray Ilaah wuu la kulansiine 
• Inaan ruuxna soo korodhsanayn kaa ha la ogaado 

• Ninkase koob nimca ah fuuqsadee kadin irmaan maala 
• In karuurka uu qubo horay kaafka ugu tiille 
• Killigiiba Reer-Hagar anaa kiin ah baa rogaye 
• Kamma Sugulle maankii sidii kuray carruureede 
• Kas xumaa hoddaye naagta way kala fogaayeene 
• Ragow kibirka waa lagu kufaa kaa ha la ogaado 

• Lixda koos ee Reer Cali-gariye kaw iskaga siiyey 
• Kasi waaye wuxu waa qabaal waadna kabataane 
• Ragow kibirka waa lagu kufaa kaa ha la ogaado 

• Kaysaha adduun Ina Amaan kuma qarraacnayne 
• Ragbaa keeno gali buu is yidhi waad u koraysaaye 
• Misna kama fileyn mana hadayn kii Israa'ilaye 
• Ragow kibirka waa lagu kufaa kaa ha la ogaado 

• Af xakame karkabadii u ay iyo kulaylkiiye 
• Ka dambee Calluu yidhi intuu Kaaha guursadaye 
• Isna kaal u tumay weyn intuu kariyey waabeeye 
• Ragow kibirka waa lagu kufaa kaa ha la ogaado 

• Kalmadduu lahaa Ina Galaydh kohay gadaashiiye 
• Kaarkuba ma joogeen hadduu keeno tuluddiiye 
• Baallacad kalyaha kuma jareen kii uu quudhsadaye 
• Ragow kibirka waa lagu kufaa kaa ha la ogaado 

• Raguu muxumud waal raray haduu saanta uga kaadsho
• Kulcad uma ay dileen oo hadana koor magaliyeene
• Ragow kibirka waa lagu kufaa kaa ha la ogaado

• Cartan dhuurta kooraha markuu kor ugu laalaayey 
• Garaad Faarax dhay iyo karuur kala macaanaaye 
• Misna kala khadhaadhaa dhunkaal kulankii goobeede 
• Ragow kibirka waa lagu kufaa kaa ha la ogaado 

• Adaa dunida kaligaa leh buu Koofil eersadaye 
• Kashiisaba ma galin wiilalbaa keebka kuu qabane 
• Ragow kibirka waa lagu kufaa kaa ha la ogaado 

• Kaakici wadaadkii dagaal laguna kaalmeeye 
• Kumanyaal laguug duub cad buu keenay Beerdhiga e 
• Waxse kadabkii go'ay maalintuu kaday raggiisiiye 
• Kabaalkiisii baa jabay markuu kariyey Reer Kheyre 
• Ragow kibirka waa lagu kufaa kaa ha la ogaado 

• Mid kuwaa ka dhigan baan arkoon kibis u laabneyne 
• Inta uu kashbacay oo kibroo kamman wan weyn yeeshay 
• Yuu niman karaamiyo colba leh kiish ka buuxsadaye 
• Kashib dhaha Adoomahoow naftii kii ladnaa gadaye

Gabay: Guuguulle

Ismaaciil Mirre

..........................................................................................................Gabayga aan kor ku sheegay,haddaan faallo gaaban ka bixiyo
sidii uu ku soo baxay: Ayadoo dalkii ay ka dhacay abaar aad u daran ee lagu baaba'ay ayuu Ismaaciil wuxuu harsanaayey geed. Kadibna shimbirka la yidhaahdo guuguulaha ayaa geedkii
dushiisii soo fariistay, dabadeedna wuxuu bilaabay in uu
halkii ka ciyo, isla markaas uu joojin waayey guuguudii.
Ismaaciil goortuu shimbirkii qayladiisii ka yaabay, wuxuu kula hadlay gabaygan. Gabaygu aad iyo aad ayuu u miro wanaagsan yahay, Soomaalida intooda gabayada jeceli way maqleen, Waa gabay qiimo badan, Marka Ismaaciil wuxuu yidhi:

• Guuguulihiiyow haddaad guga u ooyayso, 
• Oo aad moodday keligaa inuu gubayo jiilaalku, 
• Oo aad gamoorahakan maran gama' la'aan diiday,
• Ayna gocosho awgeed ilmadu kaaga gobo'laysay, 
• Guumays cirroobaan ahaye war an ku gaarsiiyo, 
• Gartaa maaha keligaa inaad gaar u cabataaye,
• Giddigood addoomaha waxaa gaaray nabar weyne, 
• Abaar gaag ma reebaa dhacdiyo gaatamoo kale e, 
• Geelii adduunka u adkaa gobollo waydowye,
• Golihii ka kici waa raggii gaydho hayn jiraye, 
• Tuuladay ilgabadlaynayaan gobol barbaartiiye, 
• Ninkii timirta goob dhigi lahaa jiingaduu geline,
• Ninna uma garaabeen haddaan gaadhka laga hayne, 
• Gammaankii ka maray dhoodi iyo galaxyadeediiye, 
• Gumburigii bar baa joogsadiyo goroyo cawshiiye,
• Saryankii garbaha weyn lahaa geed ka kici waaye, 
• Wuxuu gooni daaqii habsaday gubaddadii Hawde, 
• Garanuugti iyo deeradii gaag yar baa haraye,
• Gobay iyo askari geyfan baa goodirkii jaraye, 
• Guuyadiyo jiiskii hadday kala gol waayeene, 
• Kama guuxo aar goonlihii geliga toomoode,
• Shabeelkii gabraar lagu idlee giiro layn jiraye, 
• Oo gododka kama soo ciyaan gabannadiisiiye, 
• Hargihiisa nimankii gataa guuldarraw sidaye,
• Gaadiidkii la dhaansanahayiyo giindhaygii maraye, 
• Ahmigii la gawrici jiriyo gaabay adhigiiye, 
• Goggii subagga laga buuxin jirey hataan gorofaadye,
• Basaas bay timihii uga go'een gaaridii dumare, 
• Galowgiiiyo fiintii naf bay giida la hayaane, 
• Gorgorkiyo dhurwaagii laftaad galayax mooddaaye.
• Garaad Faaraxiyo Maxamuud Garaad ma leh gammaankiiye, 
• Cood kama gurxamo dooxadii garada fiicnayde, 
• Garoowe iyo Bookh bay harraad qaar u go'ayaane,
• Gaajiyo rafaad bay qabaan garow la'aaneede, 
• Ayaxii geyiga joogi jirey guuto lagu saarye, 
• Gubniyaa hareeraha ka maray gaariyaal wada e,
• Geedaha sun baa loogu daray geerinaw badaye, 
• Wax ma galabsanine maalin baa loo guddoonsadaye, 
• Adigaaba lagu gaadayaa waadan garanayne,
• Guuxiyo cabaadkiyo haddaad gooha damin waydo, 
• Quruumahakan wada geyfan baa baalka kaa guriye, 
• Gaagaabso oo aamu yaan gaar lagaa qabane!!!
•